Freedom Fighter အနေဖြင့် မြန်မာ့လူ့အဖွဲ့အစည်း၏ အရင်းခံပြဿနာမှာ စစ်ဝါဒ (ဝါ)​ အကြမ်းဖက်ခြင်းကို စွဲလမ်းမှုဟု ရှုမြင်သည်။ တဖန် အကြမ်းဖက်ခြင်းဖြင့် စုပေါင်းအမှတ်သရုပ်ကို အတင်းအကြပ်ဖန်တီးရန် ကြိုးပမ်းမှုသည်လည်း အောင်မြင်မှုမရသကဲ့သို့ လူမျိုးစုများအကြား ကွဲဟမှုနှင့် မုန်းတီးမှုများကိုသာ ဖြစ်စေကာ လူမျိုးကြီးဝါဒနှင့် ကျဉ်းမြောင်းသည့် လူမျိုးစွဲဝါဒများကို ပို၍အားကောင်းစေခဲ့သည်။ ယင်းကဲ့သို့သော စစ်ဝါဒနှင့် လူမျိုးရေးပဋိပက္ခများကြောင့် မြန်မာနိုင်ငံသည် ကမ္ဘာ့အရှည်ဆုံး ပြည်တွင်းစစ်ဝဲကယက်အတွင်း နစ်မွန်းနေခဲ့သည်။

ဤအရင်းခံအကြောင်းတရားများကို ကုစားပြောင်းလဲဖို့ Freedom Fighter အနေဖြင့် အလင်းခေတ်တော်လှန်ရေးကို အပိုင်းနှစ်ပိုင်းဖြင့် ဖော်ဆောင်သွားရန် ချမှတ်ထားသည်။ တပိုင်းမှာ စစ်ဝါဒကို အလယ်အလတ် အကြမ်းမဖက်လမ်းစဉ်ဖြင့် အခြေမှအထက်သို့ ပြောင်းလဲကုစားသွားရန် ဖြစ်သည်။ တဆက်တည်းတွင် ကျဉ်းမြောင်းသည့် အမှတ်သရုပ်များအကြား ပဋိပက္ခအကွဲအဟများကို ကုစားဖြေရှင်းပေးနိုင်ဖို့ တိုးတက်သောအမျိုးသားရေးဝါဒဖြင့် အားလုံးပါဝင်နိုင်သည့် အမှတ်သရုပ်အသစ်ကို အကြမ်းမဖက်ဘဲ ဖန်တီးသွားရန် ဖြစ်သည်။ ဤကဲ့သို့ လူမှုယဉ်ကျေးမှုတော်လှန်ရေးနှင့် နိုင်ငံရေးအယူအဆတော်လှန်ရေးနှစ်ခုကို ဟန်ချက်ညီညီ ယှဉ်တွဲအသုံးချကာ မြန်မာပြည်သူတရပ်လုံး လိုလားတောင့်တနေသော ငြိမ်းချမ်းရေးနှင့် လူ့ဂုဏ်သိက္ခာကို ရရှိသည်အထိ ရေရှည်အစီအစဉ်ဖြင့် တစိုက်မတ်မတ်လုပ်ဆောင်သွားရန် သန္နိဋ္ဌာန်ချထားပါသည်။